Saltar para: Post [1], Comentários [2], Pesquisa e Arquivos [3]

"Na Bóka Noti", de Tomé Varela

Brito-Semedo, 21 Fev 10

Ex livr li ten un titl k, na kriol de Sonsent e Na Bukinha da Not, na d Sintanton,  Na Dzinparin, y na d Fog, Na Fuska, Fuska. Ex e un titl k t fazê nox, leitor, viajá pa kix tenp d kanikinha, tenp d nox mninénsa, kónd inda ka tinha televizãu nen alux, o so tinha algunx poxt d lux ne rua, y riuní na pónta d xkina pa kontá xtória tinha un papel inportant d xpaiá mensájen, d mtê max nov na grup d max bedj y d pasaja d informasãu y d kunhesiment, y k t kabá pa ser baz d noxmemória tant d grup kom individual. 

 

Y tinha grandx kontador d xtória, pelumênux na tenp k mi éra buizin! N ta lenbrá d Nha Julinha d Kinkin, Txéta d Nho Jirmón, Funhú d Nho Nton Bertol, Lalela d Nha Liza (nha tiu), Lij d Nho Fons, Séza d Nho Gust y un data d jent bon na kontá xtória.

 

Éra kxtum tanbê na ilhax agrikla móda Sintanton, Saniklau, Santiag y Fog, dpox dun dia inter d trabói kansód na kónp, jentx grand y pikní juntá na bukinha da not pa xparajá (“dispadisê”). Y un manera d xparajá o dispadisê éra ptá dvinha y kontá xtória. Na Fog ix tanbê tava inkluí kurkutí o fazê kurkutisan.

 

Ex fakt d no ser rezultód d povx desenraizód –negr afrikan, esensialment d’oralidad, y brónk eurupeu y judeu sefardita d’Áfrika d Nort, susiedadx d xkrita – t fazê k nox tip d xtórias y, dun manera jeral, d nox folklor, ter se reíx na nox psik koletiv, k e un rezultant dex mixtura d kultura y dex dox mund.

 

Nox xtória ten nox marka, ten nox manera d ser, ten nox manera d oiá mund, ten nox identidad. Y, nex kaz, xtórias d kada un d nox ilha ten un sinal partiklar, un identidad dex ilha o dex rejiãu, o lugar, k ta da-l un guxtin xpesial k, txeu vex, e fet d xpas jeográfik, nom d jent, nom d animal o nom d planta o d arvr.

 

Vlums II y III d Na Bóka Noti, e un kolesãu d xtórias d’Ilha d Fog y ex xt’organizód d mexma manera: (i) Ómi ku mudjer, (ii) Pedru, Palu ku Manel, (iii) Lobu ku Xibinhu y (iv) Konsiderasons jinériku. Vlum II ten, pa len dis, max un part k e “Fetiseriâ y otus stória”. So ex terser vlum ten 100 xtória! Segund organizador dex trabói, nha Amig T. V. da Silva, na “Prizentason”, “kel óbra li, el ta pritende divolve pa povu (sobrutudu pa povu di Ilha di Fogu) kusa ki povu da, na un inisiativa y atitudi di rasgáta y konserba, pa un ladu, y di, pa otu ladu, divulga y provoka studu di kes kusa la”.

 

Kze k foi xkrit li ta da-m opurtunidad pa indiká kex dox manera d fazê trabói d invextigasãu d fórma antropológik: (i) sobr trabói etnográfik o d etnografía, k e un primera part dun pexkiza y k ta konsistí na observasãu y dexkrisãu o tranxkrisãu y (ii) sobr trabói etnolójik, k e un segunda part dex mexm pexkiza y k ta konsistí na reflaksãu – k e konpoxt pa análiz, interpretasãu y síntez – sigid d konparasãu y jeneralizasãu.

 

Kze k ti ta t kontsê nix trabói d rekolha d tradisãu oral e k ex e apênax etnográfk, ex primera part d un pexkiza antropológik, sima N kabá d dze. Ti ta faltá, na nha opiniãu, e d un ot sólt, y já e max d k tenp porkê ta k txeu material rekulhid y publikód. E prisiz pasá pa un xtud etnolójk «di kes kusa la» – sima Tumê dze – max profund, d’análiz y d interpretasãu.

 

Sima N t kuxtmá dze, un invextigador y un intelektual e, dun manera jeral, un kebród – pior k Djóza d Maderal – un “proletáriu d kularin brónk”. El so ten se forsa de trabói, k e se inteligénsa, y amor pa kultura y kozax d téra, y sel inkontrá un munzinha d apoi, sima nex kaz li, d Braz de Andrade, un enprezáriu d Fog, el ta ba lonj. N’e devéra Tomé Varela?!! Asin, s kada inprezáriu, kada inpréza k tá nun ilha y kada kamra munisipal preokupá k kultura d se lugar, kuidá del y promove-l, tud Kab Verd tava fká t ganhá y ta ser max rik!

 

Na Bóka Noti – I e un kolesãu d xtórias d diferentx ilha max maior part d’ex e d Santiag. Nex dox ultm vlum, Na Bóka Noti – II y III, T. V. da Silva sentrá­ na Ilha d Fog. No t fká ta xperá pa otx vlum sobr kix ot ilha xpesialment Sintanton y Sanikláu. Adé, nox tud ten direit a un Na Bóka Noti / Na Bukinha da Note o Na Dzinparin!

 

Obrigad pa busix tud y, partikularment pa Tumê Varéla pa ex dzafiu d nha primer aprezentasãu dun livr en kabverdian na nha linga matérna…!

 

- M. Brito-Semedo

 

Título: Na Bóka Noti - III

Autor: T. V. da Silva

Edição: Instituto da Biblioteca Nacional e do Livro

Ano de edição: Praia, 2008

 

 

Autoria e outros dados (tags, etc)

3 comentários

De Et a 21.02.2010 às 21:12

Olá Brito-Semedo,
N fika kontenti badikosta ku es testu na skrebedu na kriolu di Sanbisenti.
Un abrasu amigu, Etelvino Garcia

De Brito-Semedo a 22.02.2010 às 20:41

Obridagu, Amigu. Di prósima bez N ta tenta skrebe na kriolu di Praia. Mi e meiu badiu, meiu sanpadjudo y, pur isu, mi e bi-varianti.
Un brasa rixu!

De Marciano Moreira a 03.03.2010 às 17:28

Na nos kazu , midjor manera di selebra Dia Internasional di Lingua Maternu , e faze un sforsu pa uza-l , dandu nos lingua , si pusivel , novus frontera . Bravu !

Comentar post

Esquecer!? Ninguém esquece…
Suspende fragmentos na câmara escura, que se revelam à luz da lembrança...

Pesquisar

Pesquisar no Blog

Jornalista e Poeta Eugénio Tavares

Comunidade

  • Djack

    A primeira medalha faz-me muita "manha", porque nã...

  • Manuel Brito-Semedo

    Caro Zé Hopffer, Excelente! Terei isso em consider...

  • Anónimo

    Esqueci-me de me identificar no comentário anterio...

Powered by